Өмнөд Солонгост жуулчны гомдол энэ онд дээд хэмжээнд хүрлээ
Өмнөд Солонгост жуулчдаас ирсэн гомдлын тоо энэ жил дээд цэгтээ хүрсэн байна. Солонгосын Аялал жуулчлалын байгууллага (KTO)-ын нэгтгэсэн мэдээллээр 1-7 дугаар сарын хооронд улсын хэмжээнд нийт 1,753 гомдол бүртгэгджээ.
Энэ нь өнгөрсөн жилийн нийт 1,744 тоог хэдийн давсан үзүүлэлт бөгөөд аялал жуулчлал эрчимжихийн хэрээр үйлчилгээний чанарт анхаарах шаардлага улам нэмэгдсэнийг харуулж байна.
Гомдлын хамгийн их нь байр, буудлын үйлчилгээтэй холбоотой байсан бөгөөд нэг талын захиалга цуцлах, хэт өндөр цуцлалтын төлбөр авах зэрэг 500 тохиолдол бүртгэгдсэн байна. Дараа нь дэлгүүрүүдийн бүдүүлэг үйлчилгээ, хэт өндөр үнэ нэхэхтэй холбоотой 376 гомдол, нисэх буудал болон агаарын тээврийн үйлчилгээний 186, таксины жолооч нар метр ашиглахаас татгалзах эсвэл болгоомжгүй жолоодохтой холбоотой 182 гомдол гарчээ.
Бүс нутгаар нь харвал Сөүлд 665, Пусанд 594, Инчонд 176, Чежүд 155 гомдол бүртгэгдсэн байна. Ялангуяа Бусан хот BTS-ийн дэлхийн аялан тоглолтын хүрээнд зургадугаар сард ойролцоогоор 110,000 зочин хүлээн авсан нь гомдлын тоо огцом өсөхөд нөлөөлжээ.
Гадаад жуулчид нийт гомдлын 84.3 хувийг эзэлсэн бөгөөд хамгийн олон нь Хятадын иргэдээс 680, дараа нь Японы 263, Тайванийн 182 гомдол ирсэн байна. Мөн энэ оны эхний улиралд гадаад жуулчны тоо өмнөх оноос 23 хувиар өсөж 4.76 саяд хүрсэн нь түүхэн дээд үзүүлэлт болсон гэж мэдээлэв.
Судлаачид аялал жуулчлалын өсөлтийг тогтвортой хадгалахын тулд төр, хувийн хэвшил хамтран үйлчилгээний чанарыг сайжруулах шаардлагатай гэж үзэж байна. Кён Хи их сургуулийн аялал жуулчлалын профессор Юн Жи-хван “жуулчны тоо өсөхийн хэрээр сөрөг үзүүлэлтүүд ч дагаж нэмэгддэг” гэж анхааруулжээ.
📌 Монголчуудад хамаарах нь: Өмнөд Солонгос руу аялж буй Монгол иргэд, мөн Солонгост оршин суугаа гадаад иргэд байр захиалга цуцлах нөхцөл, таксины үйлчилгээ, дэлгүүрийн үнийн асуудалтай тулгарвал гомдол гаргах шаардлага нэмэгдэж байгааг энэ мэдээ харуулж байна. Ялангуяа томоохон арга хэмжээ, олон хүн цугласан үеэр үйлчилгээний нөхцөлийг сайтар шалгаж, баримтаа хадгалах нь чухал.
Эх сурвалж: Yonhap News #СолонгосМэдээ #MKOR #СолонгосХөтөч
