Солонгосын Дэжон хотод гадуур тэнэж, бүлэглэн амьдардаг өсвөр насныхан нэгэн дунд сургуулийн 15 настай сурагчийг барьцаалж, 24 цагийн турш зодсон хэрэг дэгдэж, олон нийтийг цочирдуулж байна.
Хэргийн үйл явдал
A сурагч 3-р сарын 14-нд найзтайгаа уулзахаар Дэжон хот руу явжээ. Түүнийг найз дээрээ очиход 4 хөвгүүн, 1 охин хүлээж байжээ. Тэд A-д хүчээр архи уулгасан ба согтуурсан үед нь “Чи намайг хүчирхийлэх гэж оролдсон” хэмээн нэг охин нь түүнийг гүтгэжээ. Дараа нь тэд “1000 만원 (ойролцоогоор 2 сая төгрөг) авчир” гэж сүрдүүлж, хэрэв үгүй бол явуулахгүй гэжээ. Гэмт этгээдүүд A-г хөл нүцгэн зогсоож, гутал, цамцыг нь тайлуулж, гадаа хүйтэнд байлгасан. Гар, мөр, гуя, шилбэ рүү нь арьсан бүсээр ороолгож зодсон, мөн үс, хөмсгийг нь хусч доромжилжээ. Бүр цаашлаад энэхүү хүчирхийллийн үйлдлээ олон нийтийн сүлжээнд шууд дамжуулж, “шууд лайв” хийсэн байна.
Хэн нэгэн шууд бичлэгийг үзээд цагдаад мэдэгдэж хүүг аварчээ. A хүү одоо эмнэлэгт хэвтэн эмчлүүлж байгаа ба ясны гэмтэл, шүдний гэмтэл болон сэтгэлзүйн эмчилгээ хийлгэж байна. Хүүгийн аав: “Хүү маань айгаад үсээ засуулж ч чадахгүй байна. Энэ бол хүнлэг бус үйлдэл, хүүг минь хүн гэж харахгүй араатан шиг харьцсан” гэжээ.Хуульчид: “14-өөс дээш насныханд эрүүгийн хариуцлага хүлээлгэх боломжтой. 18 настай байсан ч ийм ноцтой хэрэг үйлдсэн бол заавал хорих ёстой.” гэж үзэж байна.
Одоогоор хэргийг хуулийн байгууллагууд шалгаж байгаа бөгөөд олон нийт хатуу шийтгэл оноохыг шаардсаар байна.
